Dhaka mein Bangladesh ka Spin Jaal: Tagenarine Chanderpaul aur Justin Greaves ne chhoda saath

Dhaka ki tapti dhoop aur turning pitch par West Indies ki halat patli hoti dikh rahi hai. Teesre din ka khel jab shuru hua to umeed thi ki Caribbean batters Bangladesh ke total ko dhost karenge, lekin lunch tak kahani badal chuki hai. West Indies ab bhi 59 runs peeche hai aur unke 6 bade khiladi pavilion laut chuke hain.

To Hua esa hai ki:

Morning session ki shuruat kaafi dhamakedar rahi. Tagenarine Chanderpaul ne aate hi apne mansube saaf kar diye the. Unhone Taijul Islam ko ek bhayanak six jadkar apna irada jataya aur jald hi apni teesri Test Fifty bhi poori kar li. Aisa lag raha tha ki Chanderpaul aaj lambi paari khelenge, lekin Shoriful Islam ki ek behtareen ball unke bat ka edge lekar second slip mein khade Najmul Hossain Shanto ke hathon mein chali gayi. Yeh West Indies ke liye pehla bada jhatka tha.

Tagenarine Chanderpaul aur Justin Greaves ke beech 65 runs ki partnership hui thi jisne team ko 97 for 4 ki nazuk sthiti se bahar nikala tha. Chanderpaul ke jaane ke baad Roston Chase crease par aaye aur unhone kuch kabil-e-tareef shots khele. Unhe kismat ka saath bhi mila jab Mominul Haque ne short leg par unka ek mushkil catch chhod diya. Lekin lunch se theek pehle, Nayeem Hasan ne game palat diya. Unhone Justin Greaves ko 46 runs par LBW out karke Bangladesh ko session ke aakhri lamhon mein badhat dila di.

Analysis & Numbers

• West Indies ka score lunch tak 213 for 6 hai, wo abhi bhi 59 runs peeche hain.
• Tagenarine Chanderpaul ne 56 runs ki fighting innings kheli, jabki Justin Greaves 46 par out huye.
• Taijul Islam ne 2 wickets lekar West Indies ki middle order ki kamar todi.
• Bangladesh ne pehli innings mein 272 runs banaye the, jisme Shadman Islam ka 105 runs ka shandaar yogdan tha.

Stay tuned to The Guru Gyan for more unfiltered cricket masala!