Guwahati ke Barsapara Stadium me aaj wo hua jiski ummeed kisi Indian fan ko nahi thi. Pindrop silence. Ek bhara hua stadium bilkul khamosh ho gaya kyunki West Indies ne batting ka wo nazaara pesh kiya jo shayad hi pehle kabhi dekha gaya ho. Visiting team ke liye isse bada satisfaction aur kuch nahi ho sakta ki wo host nation ke garh me jaakar unhe backfoot par dhakel de. West Indies ne ODI cricket ka apna pehla 400 plus score khada kar diya hai aur ab India ke samne khada hai 406 runs ka wo pahad jo aaj tak kisi team ne chase nahi kiya hai.
To Hua esa hai ki:
Shuruat se hi iraade saaf the. Injury ki wajah se Justin Greaves bahar the lekin unki kami mehsoos hone nahi di John Campbell ne. Campbell ne aate hi India ke bowlers ki dhulai shuru kar di aur sirf 29 balls me West Indies ke liye India ke khilaaf joint-fastest fifty jad di. Powerplay khatam hote-hote score 69 runs tak pahunch gaya tha. Iske baad shuru hua asli Masterclass. Shai Hope jo hamesha se team ki reedh ki haddi rahe hain unhone batting order me niche aakar bhi apni pedigree dikhayi. Unhone na sirf Brian Lara ka record toda balki apni 20th ODI century bhi poori ki.
Lekin kahani yahan khatam nahi hui. Amir Jangoo ne middle overs me aakar jo tabahi machayi usne India ke spinners ko game se bilkul bahar kar diya. Kuldeep Yadav ne do wicket zaroor liye lekin runs rokne me wo bhi nakam rahe. India ki mushkilein tab aur badh gayi jab Prasidh Krishna sirf 5 overs phenk kar chotil ho gaye aur Naman Dhir bhi bowling ke dauran injured ho gaye. Do bowlers kam hone ka fayda Roston Chase ne uthaya aur aakhri 10 overs me 76 runs loot liye.
Analysis & Numbers
- ODI history me sirf छठी baar aisa hua hai ki ek hi innings me 3 batters ne centuries lagayi hon.
- John Campbell ne 65 balls me 101 runs banakar West Indies ke liye 5th quickest century ka record banaya.
- Shai Hope ne 104 runs banakar 20 centuries ka milestone touch kiya jo unhe Caribbean legends ki list me upar le jata hai.
- Amir Jangoo ne 77 balls me 114 runs ki explosive innings kheli jo is match ka turning point sabit hui.
- India ko jeetne ke liye apne highest chase se bhi 44 runs zyada banane honge jo ki ek mammoth task hai.
The Guru Gyan Verdict:
Seedhi baat ye hai ki aaj hamari bowling bilkul be-asar rahi. Jab aap 400 plus concede karte ho to bahane kaam nahi aate. Injuries ne zaroor Captain ka plan bigada lekin West Indies ne aaj jaisa intent dikhaya hai waisa shayad hamare padosi Pakistan ke players pure saal me nahi dikha paate. Unki batting dekh kar laga ki wo jeetne ke liye aaye hain. India ko agar ye match bachana hai to top order ko out-of-the-world batting karni hogi. Guwahati ki pitch par runs hain lekin 406? Ye Mission Impossible jaisa lag raha hai lekin yaad rahe ye India hai yahan miracles hote rehte hain.
Stay tuned to The Guru Gyan for more unfiltered cricket masala!