Southampton ki chamakti dhoop mein aaj ek aisa thriller dekhne ko mila jisne fans ki dhadkane tej kar di. Ek waqt par aisa lag raha tha ki Ireland ek bada ulatpher kar degi, lekin defending champions New Zealand ne apne tajurbe ka istemal karte hue hare hue match ko mutthi mein kar liya. Yeh match kisi rollercoaster ride se kam nahi tha, jahan kismat har over mein karwat badal rahi thi.
To Hua esa hai ki:
Match ki shuruaat New Zealand ke liye kisi nightmare se kam nahi thi. Orla Prendergast ne apni gazi se NZ ke top order ko tahas-nahas kar diya aur score 10 runs par 3 wicket ho gaya. Yahan se Melie Kerr aur Brooke Halliday ne kaman sambhali aur team ko mushkil se nikala. Isabella Sharp ki 36 runs ki innings aur ant mein Suzie Bates ke ek hatke six ne NZ ko 140 ke sammanjanak score tak pahunchaya.
Jab Ireland batting karne utri, to unka irada saaf tha. Gaby Lewis aur Orla Prendergast ne milkar NZ ke bowlers ki jamkar khabar li. Ek time par Ireland ka score 116 par sirf 1 wicket tha aur jeet bilkul samne dikh rahi thi. Lekin phir hua Melie Kerr ka magic. Melie ne 18th over mein do bade wickets chatka kar match ka rukh hi palat diya. Last over mein 15 runs chahiye the aur Suzie Bates ne apni anubhavi bowling se Ireland ko target se 4 runs peeche rok diya.
Analysis aur Numbers:
- Melie Kerr ne bat se 30 runs banaye aur ball se 2 wickets lekar asli Gamechanger sabit huyi.
- Orla Prendergast ka all-round performance bekar gaya unhone 59 runs banaye aur 2 wickets bhi liye.
- Ireland ne 116/1 se kolapse kiya aur agle 20 runs ke andar apne main batters gawa diye.
- Suzie Bates ne apne 19 saal ke career mein pehli baar number 7 par batting ki aur bowling mein match finish kiya.
The Guru Gyan Verdict:
New Zealand ki team aaj kismat wali rahi ki unhe Melie Kerr jaisi player mil gayi warna Ireland ne unhe lagbhag pack kar hi diya tha. NZ ki fielding aur top order batting abhi bhi chinta ka vishay hai. Agar unhe semi-final mein apni jagah pakki karni hai to Scotland aur England ke khilaaf isse behtar khel dikhana hoga. Ireland ke liye ye ek heartbreaking loss hai lekin unhone dikha diya ki wo badi teams ko takkar dene ka dum rakhte hain. Professionalism aur pressure handling hi NZ ko jeet dila gayi.
Stay tuned to The Guru Gyan for more unfiltered cricket masala!